Бизимкилер биринджи
Хайри КЕЛЬДАМЕТ, Багъчасарай ш.
Бу сёзни эшитмеген, онынен таныш олмагъан инсан дюньяда аслы бармы экен? Энди мен Бразилия, Аргентина я да дигер Латин Америка мемлекетлерининъ сакинлерини эсапкъа алмайым. Мен сабыкъ Советлер Бирлигинде яшагъан футбол мухлислерини козьде тутам, чюнки совет телевидение яйынларында бир де бир командалар арасында футбол оюныны косьтереджек олсалар, футбол мухлислери шу куню мавы экран огюнде отурмакънынъ чаресини арай эдилер. Эм не олмасын, иштен, дерстен зувамы, чаресини илле тапа эдилер. Шу арекет бир аньане олып къалды. Футбол оюны инсангъа та балалыкъ чагъындан синъдириле эди. Айны заманда да ойле. Келишеми, келишмейми, бала топны тепмеге арекет эте. Атта Озьбекистанда яшагъан йылларымызда докъузынджы — онунджы сыныф талебелери памукъ йыгъгъан вакъытта куньдюз тарлада, болдургъанларына бакъмадан, ерли кой генчлеринен футбол ойнамагъа чаре тапа эдилер. Шимди де ойле. Койме-кой ойнайлар. Кет-кете футболгъа меракъ эп арта, мухлислер сайысы исе осе.
Сонъки эки-учь йыл девамында Русиеде планлаштырылгъан джиан боюнджа футбол чемпионаты этрафында олаяткъан фикир-муляазаларны алайыкъ. Атта кеченлерде Москвада юксек севиеде олып кечкен корюшювде эки президент озь мемлекетлерининъ футбол командаларыны 2018 сенеси чемпионатынынъ финал оюнында корьмеге арз эттилер. Эбет, арз этмек – зарар кетирмей.
Чемпионат башланмасына вакъыт аля даа бар, анджа футбол, онынъ тарихинен багълы чешит тедбир-оюнлар артыкъ башланды. Баягъы вакъыт кечти, Акъмесджитте футбол мухлислери арасында Къырым боюнджа агъзавий ярыш-конкурс кечирильди. Ярышта Къырымнынъ чешит кошелеринден кельген футбол мухлислери ве футбол ирфанлары (знатоки) иштирак эттилер. Бу зекявет ярышны Къырым футбол федерациясы тешкилятландырды.
Конкурс-ярышкъа къоюлгъан суаллер бойле эди: Джиан футболнынъ тарихи; Джиан ве Авропа чемпионатлары; Футбол Олимпик оюнларында; Чемпионатлар лигасы; Сабыкъ СССР ве Русие чемпионатлары. Эбет, Къырым футболы да истисна дегиль. Ярышта Къырым футболынынъ ветеранлары да четте къалмадылар. Меракълысы шунда ки, Къырым миллетине менсюп футбол ирфанлары ярышта фааль иштирак этип, ватандашларымызнынъ алгъышларыны къазандылар.
Бу футболгъа багъышлангъан конкурс-ярышында Багъчасарай районынынъ командасы (Буюк-Сюрень коюндеки истидатлы балалар ичюн гимназия-интернат талебелери) биринджи ерни къазанмагъа мунасип олдылар. Шахсий биринджиликте де шу окъув муэссисени беден тербиеси оджасы Украина тасиль ве илим назирлигининъ аляджысы, Къырымда нам къазангъан оджа Ридлан Джафер огълу Юнусов гъалебе къазанды. Иште, къырымтатарлар ойле олмалы! Бир вакъытлары «…Истанбулда, Парижде биринджи олып, Японлар да оларгъа еталмайлар…», — деп, нафиле язылмагъан.
Ридлан оджа сюргюнлик йыллары Озьбекистаннынъ Фергана виляети, Кува шеэриндеки мектепте беден тербиеси оджасы олып чалышкъандан берли футбол «хастасы» эди. Бу «хасталыкъны» о студентлик чагъындан башлап, сонъ мектеплер ара футбол биринджиликлеринде оюнджы сыфатында иштирак этип, «къазангъан». Шимдиди исе о футбол «хасталыгъыны» озь талебелерине «юкътура». Бу «хасталыкъ» инсанны сагъламлаштыра.
Къайда бакъсанъ – насылдыр ярыш олса олсун — къуруджылыкъ, транспорт, кой ходжалыгъы, айван асравджылыгъы, сокъакълар темизлиги, бири биринен мунасебетлиги я да дигер саалардамы – эпеий алда бизимкилер биринджилер сырасында ер алалар. Акъылгъа ята, эм бу вазиет къырымтатарларны къувандыра. Эшкъ олсун халкъымызгъа! Къана, халкъымыз газета-китап окъувына да япышып окъуса, вазиетимиз, ихтимал, азчыкъ олса да, даа яхшы тарафкъа айланыр экенми, деп арзугъа далгъандайын олам.
comments powered by HyperComments